LAOAG CITY – Im-imbestigaren ti Philippine National Police – Criminal Investigation and Detection Group no siasinno dagiti nagatendar iti meeting sakbay a naiyuswat ti war on drugs ti dati nga administrasyong Duterte.
Daytoy ti inbatad ni Philippine National Police spokesperson P/Brig. Gen. Jean Fajardo.
Segun ken ni Fajardo, kaadoan kadagiti nagan a nadakamat ni Retired police colonel Royina Garma a nagatendar iti taripnong ket inimbitaranen ti Quad Committee.
Nupay kasta, kuna ni Fajardo a kayat da a maamoan amin no siasinno dagiti nagatendar iti taripnong nga inpaawag ni dati a Presidente Rodrigo Duterte sakbay ti pannakaiyuswat ti war on drugs tapno maamoan ti kinapudno.
Mainaig iti daytoy, inpakaammo ni Fajardo a nangipaayen ti statement ti sumagmamano a nagserbi nga hepe ti nailian a pulisya iti babaen ni dati a Presidente Duterte ken maiyur-uray laengen ti dadduma.
