LAOAG CITY – Nakaalerto dagiti kameng ti Philippine National Police Currimao nga idadauloan ni Police Captain Michael Permison ti Chief of Police iti nasao nga ili.
Kunana a nangrugi dan a nangted ti ballaag kadagiti kailian da nangruna kadagiti residente nga asideg ti kabaybayan a no bilang pumigsa ti tudo gubuay iti Bagyo Ambo ket dagitoy ti ummuna a makapasar ti layos rason a binagbagaan da dagitoy a dagus nga agbakwit no kas pangarigan.
Gapu iti daytoy, ginutigot ni Police Captain Permison dagiti umili nga agsagana no bilang sumangbay ti iduduprak ti Bagyo Ambo ditoy Ilocos Norte.
Inpakaammo na nga adda ti koordinasyon ti PNP Currimao iti biang ti Municipal Disaster Risk Reduction and Management Office (MDRRMO) ken dagiti Barangay Officials pakaseknan iti daytoy mapaspasangasangan a Bagyo.
Innayon na a naiget metten a mapawilan dagiti mangngalap a mapan iti kabaybayan gapu iti napigsa nga angin a mangitunda ti dadakkel a dalluyong a mangited ti risgo kadakuada.
