LAOAG CITY – Ibilang ni Police Captain Irineo Sibucao, ti chief of police ti Philippine National Police (PNP) ti Bangui a dakkel a problema da ti agkurba a paset ti viewdeck iti nasao nga ili.
Inbatad na nga iti baet nga ado dagiti silaw ken signages ket ado latta dagiti madisdisgrasya aglalo kadagiti dadakkel a lugan.
Mamati ni Sibucao a gapu iti kadagsen ken pannakadiskarkulo dagiti driver ti iturturong da a lugar ti rason iti disgrasya.
Mainaig iti daytoy, nagballaag ni Sibucao kadagiti motorista para iti naan-anay a panagan-annad da aglalo ita nga Holiday season.
Kabayatanna, inpakaammo ti opisyal nga addan iti natalged a kasasaad ti driver ken pahinante ti truck a nadisgrasya iti nadakamat a lugar.
Innayon na a basar iti imbestigasyon da ket nadagsen unay ti karga ti truck isut gapuna a bayat ti panagbaba na iti paset ti kalsada ket saannan a nakontrol pay a nangitunda ti pannakatulid na.
Naamoan a ti nasao a truck ket aggapo iti Metro Manila ken mapan koma agideliber idiay Sanchez Mira, Cagayan idi napasamak ti insidente.
