LAOAG CITY – Isagsaganan ti PNP-Dingras ti kaso a theft kontra kadagiti suspek iti panagtatakaw iti groserya a masarakan iti tiendaan ti nasao nga ili.
Segun ken ni P/C/Inps. Joseph Calderon, Hepe ti Pulisya ti nasao nga ili, daytoy ket kalpasan a nabigbigen dagitoy babaen ti Grocery Boy a ni Jaylord Gatioan y Anno, agtawen ti 19 addaan ti live-in partner ken residente iti Brgy. Madamba.
Kuna na a nabigbig ni Gatioan dagiti suspek babaen iti naipakita a rouge gallery a da Miku Espiritu iti Pangasinan, Luzvinminda Ragus iti Isabela, Rita Mangandi iti San Carlos City, Pangasinan, John Does , Peter Does, ken Jane Does.
Inlawlawag ni Calderon a datin nga adda record dagiti nasao a suspek panggep iti panagtatakaw a dagitoy ti nailasin ti grocery boy a nagingagatang idi mapukawan ti grocery ni Lilia Delos Santos y Alonzo, agtawen ti 44 naasawaan, negosyante ken residente iti Brgy. Albano, iti nasao met la nga ili.
