LAOAG CITY – Nagpalagip ni Police Major Ryan Retotar, Chief of Police ti PNP Dingras kadagiti kailianna nga agan-annad iti Budol-Budol Gang.
Daytoy ket kalpasan a naprebentaran ti posible a pannakabiktima dagiti taga-Barangay Cali iti nasao nga ili manipod kadagiti mapapati a miembro ti Budol-Budol Gang.
Segun ken ni Barangay Chairman Teddy Rosqueta, sumagmamano a lallaki ken babbai a naglugan iti maysa a van ti mismo a sinita ken pinatalawna nga insigida kabayatan ti kaaddada iti mismo a sakop ti Barangay-da.
Kuna ni Police Major Retotar a no saan a dimmanon daytoy a pasamak iti istasyonda ket rumbengda latta a paigetan ti panagbantay kadagiti kailianda para iti seguridad iti tunggal maysa.
Inpagunamgunamna a dagitoy a tattao ket maipagarup nga aggatangda kadagiti daanen nga alahas ngem nupay kasta awan met ti maipakitada a permit wenno naan-anay nga identification cardda.
Inpakaammona a tapno maliklikan ti modus a Budol-Budol ket saan a makisarsarita kadagiti saan nga am-ammo ken asitgan dagiti estranghero.
Inpalgakna a nasken nga agbalin nga alerto dagiti umili gapu ta awan ti pilpilien dagiti managgundaway a biktimaenda.
Maipalagip nga itay kallabes ket adda taga Sarrat a nabiktima iti Budol-Budol kalpasan nga intarayda dagiti nagduduma nga alahas ket sinuktanda iti nakarkartib a pappapel.
