LAOAG CITY – Ginutigot ti Philippine National Police (PNP) ti publiko nga agbalin a naridam ken insigida nga ipulong iti opisinada ti aniaman a mapaspasamak a panaggatang ken panaglako kadagiti butos ita a national ken local elections.
Inbatad ni Philippine National Police Chief Gen. Rommel Marbil a saanda nga agpangadua nga arestaren ti asinoman a matiliwan nga aglaklako wenno gumatgatang kadagiti butos.
Naiget pay ti pammilinna iti kapulisan a papigsaen ti monitoring ken imbestigasion kontra kadagiti aglaklako ken gumatgatang kadagiti butos.
Inpasingkedna a saanna a palabsen a patawan ti nadagsen a paannusa no adda ti pulis a karaman nga adda ti pakainaiganna iti pulitika.
