LAOAG CITY – Paim-imbestigaran ni Philippine National Police (PNP) Chief PGen. Jose Melencio Nartatez, Jr. ti rason iti panagserra ti sumagmamano a gasoline station kagiddan ti panagngato ti presio ti petrolyo.
Inbatad ni Nartatez, inbilinnan dagiti hepe ti pulisia a makikoordinar kadagiti lokal a gobierno ken iti Department of Energy (DOE) tapno ammoen dagiti rason ti kellaat a panagserra ti sumagmamano a gasolinaan.
Kunana a pagam-amkan ti maipagarup nga hoarding ken price manipulation iti presio ti petrolyo.
Immunan a nagkiddaw ti tulong ti Department of Energy iti Philippine National Police iti panangmonitor ken panangtiliw kadagiti gasolinaan a maipagarup a gungundawayan ti situasion iti Middle East.
Nadakamat a naruay a gasoline station ti kellaat laeng a nagserra kalpasan ti anunsio ti price hike.
Inpasigurado ni Nartatez nga ad-adda pay a pinaigetan ti nailian a pulisia ti panangikagumaan kas sungbat iti panagdanag ti publiko nangruna kadagiti motorista a lappedan ti hoarding ken profiteering iti baet ti agtultuloy a krisis iti langis iti intero a lubong.
