LAOAG CITY – Dakkel a karit para iti Philippine National Police ti panang-match ng Deoxyribonucleic acid wenno DNA dagiti mapukpukaw a mammallot kadagiti tultulang a narekobre manipud idiay Taal Lake.
Inbatad ni Police Lt. Col. Edmar Dela Torre, Hepe ti DNA Laboratory ti Philippine National Police Forensic Group, narigat ti proseso manipud iti panangpamaga kadagiti tultulang agingga iti panangduktal dagitoy no tulang ti tao wenno ayup.
Inlawlawagna a pudno a narigat ti proseso nangruna ket aggapu iti uneg ti danum dagiti tulang gapu ta adda ti epekto ti pannakaiyuper iti kondision dagiti tulang isu a kasapulan ti naiget a panagan-annad ken panangtingiting.
Kuna ni Dela Torre, no naarisiten ket mabalin a mangbukel ti DNA profile manipud kadagitoy nga idasig kadagiti DNA ti kabagian dagiti biktima nangruna kadagiti nagannak ken annak dagitoy.
Kagiddan daytoy, inpetteng ni Dela Torre nga uray narigat ti proseso ket sigsiguradoenda ti protocol-da a nabayagen a bigbigbigen ti Korte.
