LAOAG CITY – Pagan-annaden ti Philippine National Police (PNP) ti publiko iti panag-post iti online kadagiti plano a pagturongan iti bakasion kagiddan ti panangselebrar ti baro a tawen.
Ballaag ti nailian a pulisia a mabalin daytoy nga usaren dagiti managgundaway.
Inbatad ni Philippine National Police chief Lt. Gen. Jose Melencio Nartatez Jr. a nasaysayaat lattan a saanen nga i-post dagiti plano wenno aktibidad para iti New Year agingga a makasangpet iti pagtaengan.
Kunana nga iti baet nga ar-aramiden ti pulisia dagiti amin a wagas tapno maprotektaran ti tunggal Pilipino, ginutigotna pay ti publiko a makitinnulong kadakuada tapno mapagtalinaed ti kinaurnos ken kinatalged.
Innayonna a makikokoordinar ti Philippine National Police kadagiti lokal a gobierno partikular iti barangay level tapno protektaran dagiti komunidad tapno malappedan dagiti krimen.
