LAOAG CITY – Inlawlawag ti Philippine National Police (PNP) a dagiti naikeddeng a panangikkat kadagiti rupa ken nagan dagiti pulitiko kadagiti government-funded projects ket limitado laeng kadagiti properties ken premises da, karaman kadagiti police stations, dagiti kampo, opisina ken dagiti daddum pay a pasilidad iti intero a pagilian sakupen ti organisasyon.
Iti maysa nga statement, inrakurak ni Philippine National Police Chief PGen. Jose Melencio Nartatez Jr. a ti nasao a direktiba ket maibasar iti nagbalin a pammilin ken inlungalong a pagannurutan ti Department of Interior and Local Government (DILG) a Memorandum Circular no. 2026-006.
Iti babaen daytoy, maibilbilin iti amin nga unit ti nailian a pulisya nga ikkaten dagiti signages, tarpaulins, markers, posters ken dagiti dadduma pay a materyales nga adda ti nagan, imahe wenno dagiti slogan a mangibagbagi iti maysa a politiko wenno opisyal.
Segun ken ni Nartatez, daytoy ti wagas da tapno maipakita ti pannakikaysa da iti panangpatalinaed ti political neutrality, propesyonalismo ken panangpatalged ti prinsipyo a mangipapaay ti serbisyo publiko gapu ta saan a rebbeng nga adda ti kankanunungan da.
Kabayatanna, ti panagbaklas ket naikeddeng a marugyan ken maipatungpal iti intero a pagilian tapno masigurado a mapagtalinaed ti nailian a pulisya ti integridad ken ti panagbalin a non-partisan nga organisasyon ti Philippine National Police.
