LAOAG CITY – Inrakurak ti Philippine National Police (PNP) a nagbalin a naannayas ti pannakaobserbar ti Holy Week 2026 iti intero a pagilian no sadinno nga awan ti nairekord a dadakkel nga insidente.
Basar iti datos ti pulisia, bimmaba ti bilang ti vehicular accidents manipud 9,388 iti napalabas a tawen ket nagbalin nga 8,259 ita a tawen.
Nairekord ti panagbaba iti drowning incidents manipud 143 ket nagbalin nga 84.
Nupay kasta, adda ti panagngato ti fire incidents nga umabot iti 170 ita a tawen manipud iti 82 idi 2025.
Inadmitir ni Interior Secretary Jonvic Remulla nga adda ti pakainaiganna ti pannakaitantan iti procurement ti fire trucks iti panagngato ti uram.
Kabayatanna, bimmaba ti 23% ti focus crimes manipud iti 1,574 a kaso idi 2025 ket nagbalin a 1,207 ita a tawen.
Karaman kadagiti nairekord a panagbaba ket dagiti sumaganad:
Murder: manipud 165 nagbalin 160
Homicide: manipud 65 nagbalin 49
Robbery: manipud 157 nagbalin 153
Theft: manipud 508 nagbalin 443
Rape: manipud 404 bimmaba iti 139 (kadakkelan a panagbaba)
Carnapping: motor vehicles manipud 13 nagbalin 6; ken motorcycles manipud 10 nagbalin 4
Iti pakabuklan, bimmaba ti 13% ti total recorded incidents iti intero a pagilian manipud 11,187 idi 2025 iti 9,720 ita a 2026.
Inbatad ni Philippine National Police Chief Jose Melencio Nartatez Jr., dakkel ti nagbalin a papel ti pannakibinnulig kadagiti local government unit ken dadduma pay a law enforcement agencies iti panagbaba ti krimen.
