LAOAG CITY – Inpasigurado ni Police Capt. Roi Manuel Ordonio, ti chief of police iti ili ti Marcos nga awan ti Private Armed Groups (PAGs) wenno criminal gangs (CGs) nga agdakdakiwas iti nadakamat nga ili.
Segun kenkuana, maibasar iti panagmonitor dagiti pulis ken intelligence operations, awan ti pagilasinan nga adda ti pangta mainaig kadagiti armado a grupo wenno criminal gangs iti nasao a lugar.
Kuna na a babaen iti naiget a koordinasyon ti Philippine National Police iti ili ti Marcos ken ti Ilocos Norte Police Provincial Office ket agtultuloy ti panangipatungpal da kadagiti security measures kas iti checkpoints, panagpatrolya, ken makikoordinar da iti komunidad tapno mapagtalinaed ti linak, urnus ken talna.
Mainaig iti daytoy, binalakadan met ni Ordonio ti publiko nga agtalinaed nga alerto ken ireport a dagus iti opisina da ti aniaman a makita da a mapagduduwaan nga aktibidad.
