LAOAG CITY – Nangipaayen ti naan-anay nga statement ti Philippine National Police (PNP) seknan kadagiti agwarwaras a damag maipanggep iti maysa a puraw a van nga agal-ala wenno agkumaw kadagiti ubbing.
Iti media briefing iti Camp Crame, inpetteng ni Philippine National Police Public Information Office Chief Col. Randulf Tuaño a ti agwarwaras a damag ket paset laeng ti nabayagen a sarsarita idi un-unana a panawen.
Kuna na a saanda nga ammo no paggapgapwan ti report maipanggep iti white vannga agla-ala kadagiti ubbing tapno ilako da ti kidney da.
Innayon ni Tuaño nga awan ti opisyal a report maipapan iti kastoy nga insidente ngem inpasigurado da nga agtultuloy ti panagbantay ti nailian a pulisya.
Kuna na pay nga ad-adda a pinapigsa da ti police visibility tapno maliklikan ti aniaman a krimen.
Kabayatanna, inrakurak ti Philippine National Police a bimmaba metten ti kaso ti panagkidnap nga addaan ti uppat a nairekord idi enero ita a tawen, idinto nga innem iti isu metlaeng a panawen idi 2024.
