LAOAG CITY – Nangrugin dagiti kameng ti Philippine National Police ken Philippine Marines a nagpatrolia kadagiti lugar a masansan a nakapaspasamakan ti uram kadagiti kallabes a tawen.
Segun ken ni Mr. Marcell Tabije, Local Disaster Risk Reduction Management Officer ti gobierno probinsial ti Ilocos Norte, daytoy ti pakpakauna nga addang dagiti otoridad tapno maliklikan ti mabalin nga iyaadu manen dagiti mapasamak nga uram kadagiti kabanbantayan iti daytoy a kapudot ti panawen.
Kagiddan daytoy, nagpanawagan kadagiti Local Government Units ken dagiti opisial kadagiti barbarangay a makitinnulong nga agbantay tapno ad-adda a mabantayan dagiti maiyasping nga insidente.
Immun-una ngem iti daytoy, mismo a ni Gob. Matthew Marcos Manotoc ti nakakita iti uram a napasamak iti kabanbantayan a paset ti Brgy. Manalpac iti ili ti Solsona a nangawaganna iti imatang dagiti maseknan nga ahensia.
Malaksid iti daytoy, kunana a kiniddaw pay ti gobierno probinsial iti panangidaulo ti gobernador ti tulong ti chopper ti Philippine Air Force a nangsebseb iti uram gapu ta saan a makadanon ti fire truck iti nakapasamakan ti uram.
Maipalagip nga adda ti naisayangkat a coordination meeting nga inatendaran dagiti maseknan nga ahensia kas iti Bureau of Fire Protection, Philippine National Police, Department of Environment and Natural Resources Office, Philippine Marines, Provincial Resiliency Office ken ti Philippine Air Force.
Kabayatanna, ditoy a napagsasaritaan no ania dagiti rumbeng a panagsagana iti mabalin a pannakapasamak ti forest fire ken bush fire.
