LAOAG CITY – Manamnama a sumangpet ti minilyon a pasahero nga agawid kadagiti probinsia dagitoy ita a Semana Santa.
Gapu iti daytoy, sumagmamano nga ahensia ti gobierno ti nakasagana ken naka-alerto tapno siguradoen ti pagsayaatan ken seguridad dagiti Pilipino.
Basar iti Philippine Ports Authority (PPA), mapatta-patta a 2.4 milyon a pasahero ti sumangpet kadagiti pantalan idinto a sumurok 1.3 milyon a pasahero met ti manamnama iti Ninoy Aquino International Airport basar iti New NAIA Infra Corp.
Kabayatanna, inbatad ti Land Transportation Franchising and Regulatory Board (LTFRB) a nangipaay daytoy ti special permits iti agarup 1,300 bus tapno masolbar ti panagadu ti pasahero nangruna iti panagngato ti presio ti langis.
Gapu iti daytoy, nangi-deploy ti Philippine National Police (PNP) ti agarup 60,000 a pulis tapno siguradoen ti seguridad kadagiti amin nga aktibidad ita nga Holy Week.
Kuna ni Police Capt. Amie Tiu, Hepe ti Tourist and Protection Section ti Philippine National Police Directorate for Operations, naka-heightened alert status dagiti pulis manipud Marso 29 agingga iti Abril 6.
