LAOAG CITY – Kinumpirmaran ti Philippine National Police (PNP) nga adda ti friendly fire a napasamak iti anti-kidnapping operations ti pulisya iti Angeles City, Pampanga a nakatayan ti maysa a pulis ken nakasugatan ti maysa pay.
Segun ken ni Philippine National Police Public Information Office Chief, PCol. Jean Fajardo, basar iti inisyal nga imbestigasyon, kabayatan ti clearing operation iti maysa nga apartment a nakaikabilan kadagiti dua a Chinese national, iti maysa a nasipnget a paset ti balay ket aksidente a nakalbit ti maysa a patrol man a miembro ti entering team ti gatilyo ti paltog na a nakatamaan ti dua a kakadwa na a pulis.
Immuna a nakaitamaan ti bala ni PCMSgt. Eden Accad a nangidaulo iti operasyon, ngem iti nausar a 5.56 armalite, ket simmalpot ti bala iti likod ni Accad agingga a timmama ken ni PSSgt. Nelson Santiago.
Naamoan nga awan ti bullet vest dagiti dua isut gapuna a fatal ti tama dagitoy.
Rumrumuar iti autopsy report a natay ni Santiago gapu iti itatama ti bala iti akinkannigid a paset ti barukong na a nakaapektar iti right lobe ti lungs na ken ti dadakkel nga urat iti puso na.
Nagtalinaed met a naka-confine ni Accad iti ospital gapu iti sinagaba na a sugat.
Inpetteng ni Fajardo nga awan ti cover-up a napasamak iti imbestigasyon gapu ta idi aldaw a napasamak ti insidente ket dagus nga inkabil ti pulis a nakapaltog kada Accad ken Santiago iti ospital.
Innayon na nga awan pay ti 24 nga oras ket dagus nga inadmitir ti suspek nga isuna ti aksidente a nakapaltog kadagiti dua a pada na a pulis.
Mainaig iti daytoy, kuna ni Fajardo a nupay aksidente laeng ti napasamak ket napilaanen ti suspek iti kaso a reckless imprudence resulting in homicide in serious physical injury ken agdama a nakabalud iti anti-kidnapping group.
Kabayatanna, inbilin ni Philippine National Police Chief Police General Rommel Francisco Marbil a malaksid iti nakapaltog a pulis ket maimbestigar pay dagiti team leader karaman ti klase ti paltog ken bala a nausar.
