LAOAG CITY – Inlawlawag ni PLt. Col. Joemar Labiano, ti hepe ti PNP ditoy siudad ti Laoag ti saan na a panagatendar kadagiti aktibidad iti siudad.
Bayat ti panagsarita ni Labiano iti konseho kabayatan ti session dagiti opisyal, inbaga na a ti saan na a pannakaatendar kadagiti sumagamamano nga aktibidad ket adda dagiti nairana a panagbisita na iti higher office ti PNP kangrunaan idi Agosto.
Inlawlawag na a dagiti inatendaran na ket kasapulan na iti schooling.
Mainaig iti daytoy, kuna na a ti rason iti saan na a pannakaatendar ti naglabas a flag raising ceremony ti lokal a gobierno ditoy siudad ket gapu ta nairana nga adda ti napan na inawat nga award iti higher office.
Kabayatanna, kuna ni bise mayor Rey Carlos Fariñas a dayawen na ti panagpakita ni Labiano iti session da.
Inbatad na a mangnamnama a babaen iti daytoy ket ad-adda a mapapigsa ti koordinasyon ti lokal a gobierno ditoy siudad ken iti kapulisan.
Maipalagip nga immunan a dinakamat ni bise mayor Fariñas a masdaaw iti saan a panagparparang ti hepe kadagiti napapateg a taripnong ditoy siudad isut gapu na nga inimbitaran ti konseho.
