LAOAG CITY – Inlawlawag ni Police Lt. Col. Rafael Lero, hepe ti PNP-Laoag no apay a saan a pinalubusan dagiti kameng ti pulisya dagiti rumwar itay parbangon manipud iti Barangay 32-B Lapaz West ditoy ciudad.
Ummuna iti daytoy, adda ti dimmanon nga impormasyon ditoy Bombo Radyo nga arig na maparitan amin dagiti residente iti nadakamat a barangay a rumwar.
Segun kenni Lero, alas-dos agingga iti alas-tres itay gandaten dagiti residente iti barangay a rumwar gapo ta mapan da agpick-up iti lako da nga ikan ngem awan met ti makaipaneknek nga APOR dagitoy ket saan pay a nalpas ti curfew.
Inbatad na a masapol a madeterminar wenno mapaneknekan no pudno nga APOR dagiti rumwar babaen met laeng iti tulong ti residente ngem gapo ta parbangon pay laeng ket awan ti mapagdamagan dagiti pulis a nakabantay.
Kunana a kinasarita met dagiti pulis dagiti maseknan a rumwar da intono malpas ti curfew ken tapno maamoan dan a saan a naggapo dagitoy iti critical zone.
Mainaig iti daytoy, dawdawaten ni Lero ti kooperasyon dagiti residente gapo ta awan met ti katulungan ti PNP nga opisyales ti barangay gapo ta naka-quarantine met dagitoy pakairamanan dagiti tanod.
Maipalagip a nagpositibo iti covid-19 ti maysa nga opisyal ti Barangay 32-B ken dagiti pada na nga opisyales, tanod ken BHW ti kangrunaan a nakapulapol na isut gapo na a rumbeng nga ag-isolate met dagitoy.
