LAOAG CITY – Nagballaag ni Police Lt. Col. Joseph Baltazar, ti chief of police ti Philippine National Police ditoy ciudad ti Laoag kadagiti mangiyus-uswat ti lumba ti motorsiklo iti bypass road.
Daytoy ket kalpasan nga adda dagiti natiliwan da a tallo nga indibidual nga aglulumba iti bypass road, no sadinno dagitoy ket taga ditoy ciudad ti Laoag ken dua iti ili ti Bacarra.
Kunana a dagiti natiliwan ket awanan ti lisensya ken saan a kumpleto ti dokumento ti motorsiklo, ken ti pambar dagiti natiliw ket umay da laeng agmiki ditoy ciudad.
Segun kenni Baltazar, nagturong da a dagus iti nasao a lugar kalpasan a nakaawat da ti tawag nangruna ket nabayagen a mairekreklamo daytoy gapo ta saan a makaturturog dagiti residente gapo iti kinatagari dagiti maseknan.
Kinumpirmaran na nga adda pay ti menor de edad a karaman iti lumba ti motorsiklo nga isu ti ammoen da ken paayaban da dagiti nagannak iti daytoy.
Inpetteng na a ti bypass road ket saan a nairanta a paglulumbaan no diket dalan dagiti motorista.
Kabayatanna, immapela ni Baltazar kadgaiti opisyal ti barangay a tumulong da ken agronda da iti masakupan da nangruna iti rabii tapno maliklikan ti kastoy.
Nagpanawagan pay ni Baltazar kadagiti nagannak a saan a palubusan dagiti annak da a rumuar iti rabii tapno maliklik da iti mabalin a madi a mapasamak.
