LAOAG CITY – Naka red-alert status ti PNP-Laoag kas panagsagsagana ti semana santa ken uray ti posible a panagado dagiti bisita ita a summer.
Daytoy ti inbatad ni P/Supt. Dominic Guererro, Hepe ti Pulisya ditoy ciudad ti laoag.
Kuna na nga adda mandar ni Prov’l Dir. P/Sr Supt. Jose Melencio Nartatez Jr. tapno agsagana da kadagiti nasao nga al-aldaw.
Daytoy ti rason nga insigida a nagmandar ni Guererro kadagiti kakadua na a masapul ti police visibility kadagiti Police Assistance center ken paggaaduan dagiti tao.
Daytoy ket tapno maliklikan ti posible a pannakapasamak ti krimen kas iti panagtatakaw ken uray iti pannakasipot dagiti makunkuna a salisi.
Kadua ti PNP dagiti maibilang a force multiplier kas kadagiti Bgy. Tanod iti panagipatungpal da ti pannakatagiben ti linak, urnos ken talna.
Kuna ni Guererro nga uray dagiti agtagikua kadagiti beach resorts ket nakisarita da tapno isagana da dagiti mangkita kadagiti “beach goers”.
Nakasarita payen ni Guererro ni Dr. Melvin Manuel, mangidadaulo ti Search and Rescue Operations ti Laoag para ti koordinasyon da para iti pannakaipaay ti tulong kadagiti agkasapulan.
