LAOAG CITY – Inbatad ni Police Lt. Col. Mar Louise Bondoc, ti chief of police ditoy ciudad ti Laoag nga agpapan ita ket awan pay ti naawat da a gasoline allowance manipod iti city government.
Segun ken ni Bondoc, sipud nagtugaw nga hepe ti pulisya ditoy ciudad idi enero ita a tawen ket awan pay ti naawat da a gasoline allowance.
Inbatad na a ti pay laeng us-usaren da ket aggapo iti Philippine National Police (PNP).
Nupay kasta, kunana a saan a makaumanay daytoy ngem inpasingked na a saan a daytoy ti makatubeng iti panagpatrolya da iti nagduduma a lugar ditoy ciudad ti Laoag.
Inpanakkel ni Bondoc nga iti baet ti kaawan ti gasoline allowance da ket agtrabtrabaho da latta a nasayaat ken bimmaba ti napaspasamak a krimen ditoy ciudad.
