LAOAG CITY – Paigetan pay ti PNP ti panangiyuswat da ti counseling kadagiti barangay tapno kas paset ti programa da tapno maiyasideg ken mangegan dagiti problema tapno maliklikan ti panagpakatay.
Daytoy ket kalpasan ti pannakatay kalpasan a nagbekkel ti maysa a pasyente ti Governor Ablan Sr. Memorial Hospital ditoy ciudad ti Laoag.
Ti biktima ket agtawen ti 47, naasawaan, maysa a mannalon ken residente iti ili ti Vintar.
Basar iti imbestigasyon ti PNP, kiniddaw ti biktima iti asawa na a mapan iti nurse station tapno agkiddaw ti tulong gapo ta marigatan nga aganges.
Nupay kasta, idi nagsubli ti asawa na iti kwarto da ket nakita na a nakabitin ti biktima.
Segun met iti attending physician, ti biktima ket na-diagnosed iti Acute Respiratory Failure Secondary to Pulmunary Tuberculosis, ken ti rason ti pannakatay daytoy ket Aspxia Secondary to self-inflicted injury.
Kabayatanna, natay kalpasan a nagbekkel ti maysa a lalaki iti Brgy. 55-A, Barit, Laoag City.
Basar iti impormasyon, ti biktima ket agtawen ti 61, naasawaan, embalmer ken residente iti nasao a barangay.
Iti imbestigasyon ti PNP, binaon ti agtawen ti 58 a kabsat ti biktima ti kaanakan na nga agtawen ti 27 nga ayaban ti biktima a mangrabii iti pagtaengan na.
Dagus met a napan ti kaanakan na ngem ditoy a nakita na ti biktima a nakabitin iti uneg ti pagtaengan na usar ti nylon rope.
Segun iti pannakisarsarita ti PNP iti kabsat ti biktima, sakbay ti insidente ket nadakamat ti maseknan a mailiw iti pamilya na ken naibaga na ti “pakibagam kadagijay dadduma nga kakabsat ta nga pakawanen nak iti amin nga basbasol ko”.
Mainaig iti daytoy, iti panangeksamin ni Dra. Francis Manolito B. Dacuycuy iti City Health Office ditoy ciudad iti biktima, natay daytoy gapo iti Asphyxia secondary to strangulation.
Rumrumuar a ti biktima ket nagpakamatay gapo iti maipagarop a problema iti pamilya.
