LAOAG CITY – Naikeddeng a mangi-deploy ti sumurok 100 a ribu a kapulisan ti Philippine National Police (PNP) para iti manamnama a panagdudupudop dagiti tattao ita a lawas para iti holiday exodus.
Inbatad ni Acting Philippine National Police Chief PLtGen. Jose Melencio Nartatez Jr., gagem daytoy a mabantayan dagiti terminal, transport hubs ken dadduma pay a lugar a manamnama nga agdudupudop dagiti tattao tapno mangipatungpal ti seguridad ken siguradoen a natalged dagiti biahero nga agawid ita a paskua ken baro a tawen.
Ad-adda pay a pinaigetan ti seguridad maidasig iti napalabas a tawen no sadinno a ti deployment ket saan a bumaba iti 60 a ribu.
Inlawlawag ni Nartatez, ti deployment-da ket maiyataday no aniaman ti agdama a situasion kadagiti komunidad ken kadagiti kalsada ditoy pagilian no sadinno a kunana a maobserbaran ti panagadu ti bilang dagiti tattao.
Kabayatanna, inpasigurado ni Nartatez a dagiti pulis ket nakasagana nga agresponde a saan laeng kadagiti terminals ken kalsada no diket pakairamanan dagiti business ken residential areas.
Nagpanawagan ti nailian a pulisia iti publiko a makipaset met iti panagpatalinaed ti kinaurnos ken kinatalged ita a panawen iti babaen ti panangipatungpal kadagiti bukudda a safety measures.
