LAOAG CITY – Nagballaag ti Philippine National Police (PNP) iti publiko iti ciudad ti Laoag kontra kadagiti agpampammarang a miembro ti bandido a grupo.
Reaksyon daytoy ni Police Supt. Edwin Balles, chief of police iti PNP Laoag kalpasan nga adda ti rimuar a report iti paset ti Southern Tagalog nga adda dagiti agpampammarang a bandido ken dumawdawat ti dakkel a kantidad kadagiti biktima.
Binalakadan ni Balles dagiti residente iti ciudad nga no adda ti agtext wenno tumawag ken agpammarang a bandido ket dagus da nga ipakaammo iti kwerpo ti pulisya.
Palawag na a modus operandi dagiti suspek ket ti agpammarang a bandido ken no saan a maited ti dawdawaten da ket butbutngen da dagiti biktima a papatayen da wenno uramen da dagiti balay wenno negosyo.
Innayon ni Balles a masapol a saan da a dagus a mamati kadagitoy a suspek gapo ta posible nga ulit-uliten da ti panagdawat ti kuarta no agpaabak da kadagitoy.
