LAOAG CITY – Nagpalagip ti Philippine National Police (PNP) kadagiti personnel na a ti panagiparammag ti kinabaknang ket saan a maipalubos iti ahensya.
Inaramid daytoy ti Philippine National Police kalpasan a pinilaan ti National Police Commission (Napolcom) ti kaso administratibo ti dati a PNP Health Service director gapu iti saan a maiparbeng nga aramid ti maysa a police officer kalpasan a nagsuot ti sapatos nga agbalor ti P70,000 kabayatan a nakauniporme.
Inpetteng ni PNP public information chief Brig. Gen. Randulf Tuaño a nalawag iti PNP ethics a ti naparammag a panangipakita ti kinabaknang dagiti kameng ti pulisya ket saan a maipalubos.
Kuna na a saan laeng a dagiti branded a sapatos ti maipawil no di ket uray dagiti nababalor nga alahas, ken dadduma a sanikua kas kadagiti lugan.
Iti pannakaipila ti kaso administratibo kontra iti dati a PNP official, dinakamat ti Napolcom ti 2024 resolution ken ti 2024 PNP memorandum a nakaipalaonan ti klase ti sapatos a rumbeng laeng nga isuot dagiti personnel, nupay awan ti nadakamat a brand iti dokumento.
Mainaig iti daytoy, nasaludsud ken ni Tuaño no ti pannakaipawil ti panagusar ti nagagarbo a banag dagiti kameng ti pulisya ket no nakauniporme da, ngem insungbat na a ti trabaho ken responsibilidad dagiti pulis ket saan nga agpatingga apaman nga inikkat ti uniporme gapu ta ti pagrebbengan ket 24/7.
Maipalagip a pinilaan ti Napolcom ti dati nga opisyal idi Disyembre 23, 2025 dua nga aldaw sakbay ti compulsory retirement na.
