LAOAG CITY – Nagtalinaed ti takder ti Philippine National Police a saanna a bigbigen ti hurisdiksiyon ti International Criminal Court mainaig iti imbestigasyon iti war on drugs ti dati nga administrasyon.
Sungbat daytoy ti nailian a pulisya mainaig iti nagbalin a rebelasyon ni dati a Senador Antonio Trillanes a maipagarop a kinasarita dagiti imbestigador ti nasurok a 50 a dati ken aktibo a pulis a nagserbi iti Duterte adminsitration nga adda ti pannakainaig na iti drug war.
Inlawlawag ni Philippine National Police spokesperson Police Col. Jean Fajardo nga adda ti maipatpatungpal a judicial system iti pagilian ken dagiti korte ti mabalin a mangdengngeg kadagiti panagabuso ken iregularidad iti nailian a pulisya.
Inpalgak na a daytoy ket napaneknekanen gapu ta adda dagiti pulis a nakasoanen, nabalud ken nakunviktaran isut gapuna nga iti babaen laeng ti hurisdiksiyon ti Pilipinas ti tungpalen da.
Maipalagip nga immunan nga inrakurak ti Philippine National Police a saan da nga iserbi ti aniaman a arrest warrant a possible nga iparuk-at ti International Criminal Court mainaig iti kaso ni dati a Presidente Rodrigo Duterte ken inpetteng na ti posisyon ni President Ferdinand Marcos Jr. nga awan ti bileg ti the-Hague tribunal tapno imbestigaren ti dati a presidente.
