LAOAG CITY – Nagtalinaed ti takder ti Philippine National Police (PNP) nga awan ti foul play iti pannakatay ti diaconal minister a ni Alvaro Paredes Bugarin III, residente iti Barangay Cadaratan iti ili ti Bacarra.
Inlawlawag ni Police major Sheryl Guzman, ti chief of police iti ili ti Pasuquin, maibasar iti resulta ti otopsiya ti bangkay ni Bugarin nga insayangkat ni Police Capt. HANNAH FAYE PAGAYONAN, ti Urdaneta City Forensic Officer idi Enero 4, 2026, ti makaigapu iti pannakatay ti biktima ket gapu iti pannakalmes.
Kuna na nga amin a sugat a nakita iti bagi ti biktima ket gapu iti pannakalmes na.
Maipalagip nga idi Disyembre 27, 2025 ket napan nagresponde dagiti kameng ti pulisya iti ili ti Pasuquin kalpasan nga adda ti naawat da a report nga adda ti nakita a bangkay iti igid ti baybay iti Brgy. 13, Naglicuan ti nasao nga ili.
Kabayatan ti inisyal nga imbestigasyon ket nabigbig da ti pimmusay a ni Bugarin ken naamoan a ti nagluganan na a motorsiklo ket mapukpukaw rason a dagus da nga in-flash alarm no sadinno nga iti karabian iti dayta metlaeng nga aldaw ket nasarakan daytoy iti Poblacion area ti ili ti Pasuquin.
Immuna iti daytoy, nangiwayat ti United Church of Christ in the Philippines – Northwest Luzon Conference ken Iglesia Filipina Independiente – National Priest Organization ti caravan para iti hustisia iti pannakatay ni Bugarin gapu ta patien da ken uray ti pamilya na a naparparigat sakbay a napapatay daytoy aglalo ket adda dagiti nakita a lamma ken dara iti rupa ken sumagmamano a paset ti bagina, kasta pay a naiwa ti mabagbagina.
