LAOAG CITY – Naiget a banbantayan ti Philippine National Police (PNP) dagiti gasolinaan a nagsardeng ti operasionna iti baet ti mapaspasamak a gubat idiay Middle East.
Nadakamat nga adda ti sumagmamano a netizens ti agrekreklamo iti panagserra ti sumagmamano a gas stations nga awan ti anunsio ken agkidkiddaw iti gobierno iti panangtingiting iti posibilidad ti hoarding ken manipulasion daytoy iti presio.
Gapu iti daytoy, ginutigot ni Philippine National Police Chief General Jose Melencio Nartatez Jr. ti publiko nga i-report iti pulisia dagiti gasolinaan a kellaat a nagserra no sadinno nga inpasiguradona a mapan ken imbestigaran daytoy ti pulisia.
Inbatadna a dagiti help desks ket available iti intero a pagilian tapno siguradoen nga agbalin a napaspas ti panagresponde kadagiti nasao a report.
Mainaig iti daytoy, manarimaan ti pannakikoordinar ti Philippine National Police kadagiti lokal a gobierno ken iti Department of Energy (DOE) tapno ammoen dagiti istasion a mabalin a mapatawan ti temporary closure.
