LAOAG CITY – Inpasingked ni Police Major Jephre Taccad, ti pannakangiwat ti Ilocos Norte Police Provincial Office (INPPO) nga ar-aramiden da amin a kabaelan da tapno masigurado ti seguridad kadagiti kalsada iti intero nga Ilocos Norte.
Inlawlawag a kanayun nga adda dagiti kameng ti pulisya nga agbanbantay kadagiti kalsada babaen ti panangidaulo dagiti chief of police iti nagduduma nga ili.
Malaksid kadagiti kameng ti pulisya ket adda pay dagiti Force Commanders ken Special Weapons and Tactics (SWAT) team nga agbanbantay kadagiti kalsada ditoy probinsya.
Nupay kasta, inpetteng ni Taccad nga iti baet dagiti ar-aramiden da a panagbantay ket adda latta dagiti natangken ti ulo na a motorista rason a saan a maliklikan dagiti mapasamak a desgrasya.
Inpalgak ni Taccad a masapol nga agbalin a responsable dagiti agiturturong ti aniaman ti klase na a behikulo tapno maliklikan ti desgrasya.
Mangnamnama ni Taccad a maipababa da ti bilang dagiti mapaspasamak a desgrasya ditoy probinsya.
Kabayatanna, inpasingked ni Taccad a saan laeng a dagiti motorsiklo ti sitsitaen dagiti otoridad no di ket amin a klase ti lugan.
