LAOAG CITY – Naka-full alert ti Philippine National Police iti intero a probinsya mangrugi intono bigat, Mayo 20 kas paset ti panagsagsagana ti Palarong Pambansa.
Daytoy ti inbatad ni Police Lt. Col. Jephre Taccad, ti mangidadaulo iti Provincial Operations Management Unit iti Ilocos Norte Police Provincial Office.
Kuna na a dua a ciudad ken 8 a municipalidad ti pakaangayan dagiti aktibidad a paglalabanan dagiti atleta manipod iti 18 a rehiyon iti intero a pagilian.
Inpakaammo ni Taccad nga adda ti 51 a billeting areas ken 41 sporting events no sadinno nga adda dagiti maiwaras a kameng ti pulisya kadagiti nadakamat a lugar tapno masigurado ti seguridad ken kinatalged dagiti delegado.
Innayon na nga adda met ti 350 a personnel nga augmentation manipod iti Philippine National Police iti rehiyon uno, malaksid pay kadagiti kameng ti Philippine Army, Marine, Philippine Coastguard ken dadduma pay a law enforcement unit.
