LAOAG CITY – Nangideploy ti saan a nababbaba ngem 2,250 a pulis ti Philippine National Police (PNP) kas nayun a tulong kadagiti apektado ti magnitude 6.9 a gingined a timmama idiay Cebu.
Segun ken ni Directorate for Police Community Relations Deputy Director PBGen. Antonio Marallag Jr., dagiti naideploy a pulis ket manipod iti nagduduma nga unit ken agserbi dagitoy kas nayun a manpower idiay Cebu.
Kabayatan a nakadeploy ti naruay a pwersa manipod iti Police Regional Office 7 ket nangdutuk met ti augmentation ti nailian a pulisya manipod iti Police Regional Office – 8, Negros Island Region ken dadduma pay nga unit.
Naamoan a dagiti nakadeployen a kameng ti pulisya ket nakatutuk iti panagtulong iti relief operations iti lugar pakairmanan ti rehabilitasyon kadagiti apektado a lugar.
Karaman pay a tutukan dagiti kameng ti pulisya ket ti panangpatalinaed ti seguridad ken kinatalged ti publiko nga apektado ti napigsa a gingined.
Iti agdama, addan ti 34 a PNP stations a karaman kadagiti nadadael iti gingined idinto a 37 met dagiti apektado a pulis.
