LAOAG CITY – Nangiwayat ti Philippine National Police ti counseling ken panagballaag mainaig iti pannakaipawil nga agmaneho ti motorsiklo dagiti menor de edad iti ili ti Bacarra.
Segun ken ni Police Capt. Tolentino Erum, ti baro a chief of police iti ili ti Bacarra, karaman kadagiti nakipaset iti programa ket dagiti agad-adal wenno menor de edad, nagannak wenno guardian da, kasta pay dagiti opisyal ti barangay iti nasao nga ili.
Inaramid daytoy ti nailian a pulisya kalpasan nga adda dagiti menor de edad nga agiturturong ti motorsiklo a mairamraman iti disgrasya no sadinno a ti kaudian a napasamak iti ili ti Bacarra ket pimmusay ti biktima.
Innayon na a kinasarita da dagiti opisyal ti barangay a no adda dagiti makita da a menor de edad nga agiturong ti motorsiklo ket masapol a sitaen da ken kasarita da dagiti nagannak dagitoy tapno saanen a maulit ti napasamak.
Nagyaman ni Erum gapu ta naawatan met dagiti maseknan ti kalikagom da.
