LAOAG CITY – Nangiwayat ti panaginspeksyon ti Philippine National Police iti ili ti Sarrat iti nagduduma a paggasolinaan iti nasao nga ili kagiddan iti agtultuloy a panagngato ti presyo dagiti produkto a petrolyo.
Daytoy ti inpakaammo ni Police Capt. Ashley Cacayorin, ti chief of police iti ili ti Sarrat.
Inlawlawag na nga inwayat da ti panaginspeksyon tapno masigurado nga awan ti pannakaabuso ti panagnayun ti presyo dagiti produkro a petrolyo, ken maliklikan ti hoarding tapno maprotehiran dagiti consumers.
Inpakaammo na a kabayatan ti panaginspeksyon da kadagiti paggasolinaan iti ili ti Sarrat ket awan met ti nakita da a problema gapu ta agpapada met sumursurot dagitoy iti agdama a presyo dagiti produkto a petrolyo.
Mainaig iti daytoy, nagpanawagan ni Cacayorin kadagiti umili a no adda ti makita da nga overpricing ken hoarding ket ireport da a dagus iti Philippine National Police iti ili ti Sarrat.
