LAOAG CITY – Inbatad ni Police capt. Edward Santos, ti chief of police iti ili ti Pagudpud nga ad-adda pay a pinaigetan da ti panagbantay da iti border control iti nasao nga ili.
Daytoy ket tapno awan dagiti makalibas a sumrek ditoy probinsya a saan a dumalan iti umiso a proseso ita a panawen ti coronavirus pandemic.
Segun ken ni Santos, tapno masigurado nga awan dagiti makalibas a sumrek ket amin a nakalugan kadagiti behikulo a dumalan iti border checkpoint ket bumaba tapno makita da iti uneg.
Inlawlawag na nga ar-aramiden da daytoy gapu ta addan dagiti nagbalin a kapadasan da iti kallabes no sadinno nga adda dagiti nakalibas a simrek ditoy probinsya a nagna iti border control iti ili ti Pagudpud.
Innayon na a no adda dagiti maireport kadakuada a nakalibas a simrek ditoy probinsya babaen ti pannagna da iti ili ti Pagudpud ket pagsublien da iti border control tapno dumalan iti umiso a proseso ken maiquarantine dagitoy.
