LAOAG CITY – Paigetan pay ti Philippine National Police (PNP) ti information drive kontra iti panaglako ti smuggled ken iligal a sigarilyo kadagiti sari-sari store iti intero a pagilian.
Inbilin ni Philippine National Police Chief Jose Melencio Nartatez Jr. iti amin nga hepe ti nailian a pulisya a makikoordinar kadagiti amin a lokal ken opisyal ti barangay tapno papigsaen ti kampanya iti panagiwaras ti impormasyon, kalpasan dagiti report nga agraira ti panaglako ti smuggled cigarettes iti babassit a pagtagilakoan.
Segun ken ni Nartatez, masapol a maawatan dagiti agtagikua kadagiti babassit a pagtagilakoan nga agbalbalin da a paset ti supply network dagiti sindikato no umannugot da nga aglako ti nasao a produkto.
Karaman iti information drive ti panangestablisar kadagiti brand ti smuggled ken iligal a sigarilyo tapno agserbi a pagibasaran dagiti aglako ken aggatang.
Maipalagip nga immunan a nagballaag ni Interior Secretary Junvic Remulla a mangiyuswat dagiti otoridad kadagiti panagraot kadagiti pagtagilakoan ken babassit a retailer kas paset ti kampanya kontra iti iligal a sigarilyo.
Mainaig iti daytoy, naipaayan ti maysa a lawas a pawayway dagiti aglaklako tapno isardeng ti distribusyon ken maibus dagiti tagilako da sakbay a marugyan ti naig-iget nga operasyon.
Kabayatanna, nagpanawagan met ti Philippine National Police iti publiko aglalo kadagiti babassit a pagtagilakoan a makitinnulong ken dagus nga ireport kadagiti otoridad ti aniaman nga impormasyon mainaig iti panaglako kadagiti smuggled a sigarilyo iti bukod da a lugar.
