LAOAG CITY – Direkta nga intudo ni Atty. Ferdinand Ignacio ti PNP-Paoay nga idadaulwan ni Police Major Eddie Suyat ken ti binigbig na a Police Senior Master Sergeant Marumi nga isu ti nangipaskil ti karatula iti puon ti kayo a mangak-akusar kenkuana nga abogado dagiti dakes a tao ken protektor dagiti durugista.
Segun ni Atty. Ignacio, iti alas-onse iti rabii ket adda ti police patrol car ket nagna iti dayaen ti pagtaengan da ken mapaneknekan na daytoy a banag.
Ummuna iti daytoy, kuna ni Ignacio nga idi 11:45 iti rabii ti Miyerkules ket nagwangwang ti police patrol iti sangwanan ti pagtaengan na rason a dagus a nangipatulod ti mensahe kenni Suyat ken sinaludsod na no siasinno ti nakalugan ngem saan a nagreply ti hepe.
Gapo iti daytoy ket adda pay ti nangipatulodan na ti text message a pulis ngem daytoy ket naka-off duty rason a saan na a nasungbatan ti saludsod ti abogado.
Kalpasan daytoy, kunana a simmungbat ni Hepe iti text message na no sadinno a ni Marumi ti nakalugan iti patrol car.
Kinumpirmaran ni Ignacio a ni Marumi a dinakamat ni Suyat ket isu met laeng ti irekreklamo ti abogado gapo iti maipagarop a panangpapirma ti pulis iti affidavit a mangad-admitir a maysa a drug personality ti kliyente na.
Inpetteng ni Ignacio a saan a mabuteng kadagitoy a mapaspasamak kenkuana.
Mainaig iti daytoy, kinarit ni Ignacio ni Suyat a lumaban iti legal gapo ta maipagarop a madadael ti reputasyon na kas maysa nga abogado.
Nagbalin pay nga emosyunal ni Ignacio iti pannakakigtot ken panagamak dagiti nagannak kenkuana kabayatan ti panagwang-wang ti police patrol.
Desidido met ni Ignacio a mangipila ti reklamo kontra kada Suyat ken Marumi.
Kabayatanna, nagkedked met a mangipaay ti komento ni Police Major Suyat ngem inpasigurado na a maimbestigar ti pannakaipan ti karatula iti puon ti kayo nga adda iti sangwanan ti pagtaengan ti abogado.
