LAOAG CITY – Addan ti ibilang ti PNP-Piddig a suspek iti pannakapalto-paltog ni Mary Anne Evangelista y dela Cruz, agtawen ti 60 ken residente iti Barangay Calambeg iti nasao nga ili.
Kuna ni Police Senior Inspector Grandeur Tangonan, hepe ti PNP-Piddig nga addan ti sursuruten da a motibo ken addan ti maitudo a suspek iti krimen.
Inbatad na nga iti kabiitan a panawen ket addan to ti maipilan ti kaso a responsable iti pammaltog.
Nupay kasta, nagkedked pay laeng ni Tangonan nga ibuksilan iti publiko ti katatao ti suspek ken no anya dagiti sursuruten da a motibo wenno anggulo.
Maipalagip a ti biktima ket napalto-paltogan idi rabii ti Marso 11 ita a tawen ken rumrumwar a lima a bala ti kalibre 45 ti simrek iti bagi na a rason ti nakatayan na.
