LAOAG CITY – Naiyuswat ti panangdadael kadagiti tambutso ti motorsiklo a nakumpiskar dagiti otoridad iti igid ti kalsada a sakop ti Barangay Calluza iti ili ti Piddig.
Daytoy ket mismo nga inimatangan dagiti opisyal ti barangay ken ni Mayor Eddie Guillen.
Nagusar dagiti otoridad ti backhoe a nangpitpit kadagiti nasurok 40 a natatagari a tambutso.
Segun kenni Police Lt. Tolentino Erum, chief of police ti PNP-Piddig, insayangkat da daytoy iti igid ti kalsada tapno makita ti publiko ken saan da a maakusaran nga al-alaen da dagiti kumkumpiskaren da a tambutso.
Mainaig iti daytoy, dinayaw met ni Mayor Guillen ti naaramidan ti pulisya a nangkumpiskar kadagiti ado a natatagari a tambutso ti motorsiklo.
Innayon na a napintas daytoy gapo ta makissayan dagiti tambutso a natatagari iti ili da ken maamoan dagiti kailyan na a maiparit ti kastoy a klase na a tambutso ti motorsiklo.
Naamoan nga iti ili ti Piddig ket addaan ti ordinansa a maiparit ti panagusar ti modified muffler.
