LAOAG CITY – Ad-adda pay a pinaigetan ti Philippine National Police (PNP) ti panangipaay da ti seguridad iti intero a pagilian gapu kadagiti mapaspasamak a rotational brownouts.
Segun ken ni Philippine National Police chief Police General Jose Melencio Nartatez Jr., inbilin na kadagiti kameng ti nailian a pulisya a mangisayangkat ti mobile ken foot patroling kadagiti residential ken commercial areas.
Saan a mailinged iti Philippine National Police ti panagado dagiti kaso ti krimen tunggal agpukaw ti suplay ti kuryente.
Ti nasao a pammilin ket kas panagsagagana iti posibilidad a panagngato ti kaso ti panagtakaw.
Inbilin pay ni Nartatez kadagiti kameng ti pulisya iti kada lugar a makikoordinar kadagiti barangay officials tapno mabantayan kontra iti aniaman a krimen.
Maipalagip a nangipatungpal ti sumagmamano nga electric companies iti nagduduma a lugar ti rotational brownouts gapu iti nangato a demand ti kuryente.
