LAOAG CITY – Inpakaammo ni PLt. Roi Manuel Ordonio, ti hepe iti PNP-Pinili nga agtultuloy a nakabantay ti kapulisan kadagiti nagduduma a lugar gapu iti bagyo Florita.
Daytoy ket kalpasan a naminpinsan a nadadael ti rangtay iti Brgy. Badio ken spillway iti Brgy. Buanga iti nasao nga ili gapu iti napigsa a danom gubuay ti panagtudtudo.
Nu pay kasta, kuna ni Ordonio nga awan ti nairekord a nadangran iti pannakadadael dagiti nasao nga imprastraktura.
Mainaig iti daytoy, inpakaammo ti hepe nga adda ti pito a pamilya manipod iti Brgy. Pagdilao, Badio ken Capangdangan dagiti naibakwit idi kalman ngem apaman a nages-es ti danom ket nakapagsubli met laeng dagitoy iti bukod da a pagtaengan.
Kabayatanna, kuna ni Ordonio a ti kapulisan ket addaan ti naiget a koordinasyon iti BFP ken MDDRMO para iti panagresponde.
