LAOAG CITY – Naiget ti panagsagsagana ti PNP Region I para iti mapaspasangasangan nga eleksyon intono May 2022.
Daytoy ti inbatad ni Police Brigadier General Emmanuel Peralta, ti Regional Director ti PNP Region 1.
Inlawlawag na a manarimaan ti panangestablisar da kadagiti kameng ti pulisya nga adda ti kabagyan na nga agkandidato iti eleksyon iti masakupan da a lugar.
Kuna na a no adda dagiti police personnel nga adda ti kabagyan na a kandidato iti masakupan da a lugar ket masapol a temporaryo a maiyakar ti destino dagitoy.
Inyarig ni Peralta ti provincial director iti probinsya ti Pangasinan a nareliboan gapu ta adda ti kabsat na nga agkandidato a para bise mayor.
Kabayatanna, inpakaammo ni Peralta nga iti agdama ket manarimaan metten ti panangrebisar da kadagiti quarantine control points a mausar a comelec ken anti-criminality checkpoints kabayatan ti panangrugi ti kampanya.
Immay bimmisita ni Peralta ditoy probinsya gapu ta isuna ti kangrunaan a bisita iti pannakainanugar ti 3-Storey building ti PNP iti ili ti Pagudpud ken Pasuquin no sadinno a nagatendar met ni Governor Matthew Marcos-Manotoc.
