LAOAG CITY – Inpakaammo ni P/Capt. Randy Damo, Chief of Police iti Philippine National Police iti ili ti San Nicolas dagiti addang nga ar-aramidenda tapno masigurado ti seguridad dagiti umili ken bisita a mapan kadagiti kamposanto kabayatan ti masungad a piesta ti minatay.
Segun kenkuana, adda ti naangay a panagtataripnongda pakairamanan ti lokal a gobierno iti nadakamat nga ili, Municipal Disaster Risk Reduction Management Councils, Medical teams iti Bureau of Fire Protection para iti Security Preparations ken para iti naan-anay a panagsagana iti kinatalged ti publiko para iti Undas 2024.
Karaman kadagiti addang ti pannakaideploy ti kanayonan a puersa manipud iti 2nd Provincial Mobile Force Company.
Kinunana a maideploy dagiti otoridad iti entry ken exit points iti tallo a kamposanto iti Roman Catholic, Aglipayan ken Sanctuary tapno masigurado ti kinatalged ti tunggal bisita ken adda ti mai-establisar a command post iti uneg ti kamposanto.
Innayonna a naiget to ti panagmonitorda kadagiti maipawil a maiserrek iti kamposanto kas kadagiti deadly weapon ken arak.
Inpasiguarado na ti mapagtalinaed ti seguridad dagiti bumisita iti kamposanto babaen iti pannakitinnulongda iti Ilocos Norte Police Provincial Office ken aramiden da amin a kabalaen da uray pay adda dagiti napasamak iti kallabes.
