LAOAG CITY – Nagballaag ni Police Major Joseph Tayaban, ti Chief of Police ti Philippine National Police iti ili ti San Nicolas kadagiti amin a motorista nga agsalsalungasing iti illegal parking.
Segun kenni Tayaban, daytoy ket kalpasan nga umad-adun ti mais-isyuan ti citation ticket kadagiti agipa-parking iti saan nga umiso a lugar.
Gapu iti daytoy, kunana a mapagmulta dagiti maaktuaran nga aglabsing iti nasao a linteg trapiko tapno adda ti pagmenna-mennaanda ken maadalan dagiti maseknan a driver.
Inlawlawagna a mabalin latta nga ibati ti citation ticket kadagiti lugan nga adda iti Illegal Parking gapu ta nalawag met maikanniwas iti paglintegan ti trapiko.
Inbatadna nga awan ti lusot dagiti violators gapu ta no bilang saanda pay a binayadan iti 5 business days ti multa dagitoy ket maipakaammo iti biang ti Land Transportation Office wenno LTO banag a mangitunda ti pannakarigat ti panag-renew ti lisensiya dagiti maseknan.
Inpalgakna a mapaigetan ti panangmonitor dagiti kameng ti pulisia kadagiti kalsada nangnangruna kadagiti masansan a pagdaldalyasatan dagiti luglugan a makaitunda ti nairot a taray ti trapiko.
Innayonna nga umdas met dagiti traffic signages a naipatakder kadagiti lugar a saan a mabalin a pangi-parkingan ngem aminado ni Police Major Tayaban nga adda latta dagiti saan a sumursurot ti patakaran iti trapiko.
