LAOAG CITY – Inpakaammo ni PMaj. Joseph Baltazar, ti hepe ti PNP-San Nicolas a nagtalinaed a nakalockdown ti kuerpo ti pulisya ken umaboten iti 11 a pulis ti nagpositibo iti covid-19.
Gapu iti daytoy, kuna na a walo da a nagtalinaed a nakalock-in iti kuerpo ti pulisya.
Kabayatanna, kuna na a dagiti dadduma a kapulisan nga awanan ti exposure kadagiti nagpositibo ket isu da ti mangiwanwanwan ti linak ken talna iti nasao nga ili pakairamanan ti augmentation force.
Immuna iti daytoy, inpakaammo ni Baltazar nga isuda a walo a nakalock-in iti kuerpo ti pulisya ket inulit da ti dimmalan iti swab test ken maiyur-uray ti resulta daytoy.
Innayun na a ti makitkita na a rason iti kaadda dagiti nagpositibo ti covid-19 iti kapulisan ket posible a gapu iti nagduduma a tattao a makapul-pulapol da bayat nga adda da iti serbisyo.
