LAOAG CITY – Inlawlawag ni Police Captain Reycar Almazan ti Hepe ti Philippine National Police iti ili ti Sarrat nga awan ti kinapudnona dagiti agwarwaras nga impormasion nga adda dagiti grupo iti indibidual nga agkumaw a nagturong iti Barangay 21, San Marcos ken 22, San Cristobal iti nasao nga ili.
Daytoy iti inbatad ti Hepe kalpasan a napanda binisita dagiti nadakamat a Barangay kalpasan iti pannakaalarma iti publiko.
Kuna ni Almazan a basar iti pannakisaritada kadagiti residente ket naduktalan nga awan ti kinapudnona nga adda ti naggandat a naserrek a pagtaengan.
Inlawlawagna nga adda dagiti sumagmamano nga indibidual a nangiwaras ti impormasion a nai-post iti online idi 2021 a dagiti ladawan dagiti maipagarup nga agkumaw ket dagitoy ti nagturong iti barangayda.
Kunana a daytoy ti inwaras ti maseknan uray awan iti naan-anay nga impormasyon a pammaneknekna.
Gapu iti daytoy, naalarma dagiti opisyal iti Barangay ken insigida met a minandar dagiti Barangay Tanod a mangpatalaw kadagiti nasao nga indibidual.
Iti agdama, inpakaammo ti Hepe a naikkaten ti nasao a post ken binagaanna dagiti residente iti lugar a saan nga insigida a mamati no awan iti naan-anay nga impormasion pakaseknan iti daytoy.
