LAOAG CITY – Umabot iti 11 a kameng ti Philippine National Police (PNP) ti naka-quarantine iti agdama iti PNP station iti ili ti Vintar kalpasan a nagpositibo iti covid-19 ti maysa a pulis a ni IN-C125.
Daytoy ti kinumpirmaran ni Police Capt. Suerte Ubongen, ti chief of police iti ili ti Vintar.
Inbaga ni Ubongen a karaman isuna kadagiti naka-quarantine iti police station iti agdama.
Malaksid kadakuada, adda met 13 a kakadwa da a naka-home quarantine.
Inlawlawag ni Ubongen a mapan koma agatendar ni IN-C125 ti deliberasyon mainaig iti nagasgastos na iti pannaka-opera ti saka na iti San Fernando, La Union isut gapuna a dimmalan ti antigen test no sadinno a nagpositibo daytoy, ken uray iti confirmatory test na ket positibo ti resulta na.
Kabayatanna, inbaga ni Police Lt. Col. Randy Baoit, ti pannakangiwat iti INPPO a maiyakar ni IN-C125 iti Provincial Command tapno ditoy a ma-isolate.
Agpapan ita ket manarimaan pay laeng ti maisaysayangkat a contact tracing kadagiti possible a nakapulapol ni IN-C125.
