LAOAG CITY – Addan ti pamal-palatpatan ti Philippine National Police-Traffic Division ditoy ciudad ti Laoag iti sidecar number ti tricycle a nangitaray ti 500 a pisos nga inpagatang ti ice dagiti atleta iti Region 1 Athletic Association Meet manipod iti Dagupan City, Pangasinan.
Daytoy ti inbatad ni Police Senior Master Sergeant Eric Bumagat, ti mangidadaulo iti Philippine National Police-Traffic Division ditoy ciudad ti Laoag.
Segun ken ni Bumagat, saan da paylaeng a kayat ti mangipaay ti naan-anay a detalye seknan iti sidecar number ti tricycle gapu ta iberberipikar da paylaeng a naimbag para iti pannakatiliw ti driver na iti kabiitan a panawen.
Kagiddan iti daytoy ket agtultuloy ti panagsurvey ti Philippine National Police-Traffic Division kadagiti Closed-circuit television (CCTV) a possible a nakaala iti napasamak.
Mainaig iti daytoy, inpakaammo ni Bumagat nga addan ti pannakisarita da kadagiti contingent manipod iti Pangasinan tapno agpila da ti reklamo kontra iti nasao a tricycle driver.
Maipalagip a nagpagatang ti yelo dagiti atleta ti Region 1 Athletic Association Meet manipod iti Pangasinan iti maysa a tricycle driver no sadinno a nangted da ti 500 a pisos ngem saanen a nagsubli ken nagpakita pay ti maseknan.
