LAOAG CITY – Inbatad ti Philippine National Police – Traffic Division ditoy ciudad ti Laoag a nakaimalditda ti lima a vehicular traffic incident iti las-ud ti makabulan.
Segun kadagiti otoridad, manipud iti Hulio 9 agingga Hulio 27 ket nakairekord ti lima a desgrasia idinto a dua ti maibilang a fatal accident.
Mainaig iti daytoy, dagiti nasao a fatal accident ket nakatayan ti maysa nga indibidual kalpasan a naikkat ti sidewheel ti naglugananda a kurong-kurong iti paset ti Brgy. Balatong ditoy ciudad ken ti biktima nga agdaldaliasat iti Airport Avenue, iti Brgy. Nangalisan, nga agturong iti laud idinto a napukawan ti kontrol ti driver iti handle bar ti minanehona a motorsiklo gapu iti napigsa a tudo ken nagalis a kalsada rason a nadungparna ti kongkreto a poste ti street light ti nasao a barangay.
Kabayatanna, ita nga umuna a lawas ti bulan ti Agosto ket awan ti nairekord a fatal accident.
