LAOAG CITY – Nagballaag ni Police Colonel Julius Suriben, ti Provincial Director ti Ilocos Norte Police Provincial Office mainaig kadagiti investments a maididiaya iti social media.
Daytoy ket kalpasan nga addati dua nga indibidual a natiliw gapo iti investment scams babaen iti Facebook.
Maipalagip a natiliw dagiti nadakamat nga indibidual a binigbig ni Suriben kas “May Ruth” ken “Del”, a taga Ilocos Norte ken Olongapo.
Inbatad na nga adda ti naipadanon nga impormasyon kadakuada a dagiti suspek ket aglemlemeng ditoy probinsia ken mangididiaya ti investment babaen ti negosyo da nga ukay-ukay ken overruns.
Mapatta-patta nga umabot ti 60 million ti naala dagiti suspek manipud kadagiti biktima da.
Gapo iti daytoy ket nagballaag ni Suriben a saan a dagus a patien dagiti investment ventures a maididiaya babaen ti Facebook gapo ta saan a sigurado nu dagitoy ket us-usto wenno saan gapo iti saan a makapapati a kapintas ti maididiaya.
