LAOAG CITY – Indeklarar ni Regional Director Police Brigadier General Lou Frias Evangelista a natalna ken naurnus ti pannakaiyuswat ti 2025 Midterm Elections iti intero a Rehiyon Uno.
Daytoy ti inbatad ni P/Lt.Col. Benigno Sumawang, pannakangiwat ti Police Regional Office I.
Kuna ni Sumawang a ti naannayas a pannakaiyuswat ti eleksyon ket gapu metlaeng ti panagtitinnulong dagiti nagduduma nga ahensya ti gobierno, karaman dagiti counterpart da kas ti Armed Forces of the Philippines, Philippine Coastguard, Bureau of Fire Protection, Local Government Units ken ti sibubukel a Philippine National Police iti rehiyon uno.
Kabayatanna, inlawlawag ni Sumawang a ti datos ti Philippine National Police maipanggep iti bilang ti kaso ti vote buying iti rehiyon uno ket isu laeng ti naireport kadakuada.
Sungbat na daytoy mainaig kadagiti mangkweskwestyunar no apay a bassit laeng ti kaso iti vote buying iti rehiyon uno, karaman iti Ilocos Norte idinto a nakaad-ado dagiti maipagarop a naggatang ti botos.
Mainaig iti daytoy, inrakurak ni Sumawang nga umabot iti 90 nga indibidual ti naarestar a naglabsing iti comelec gun ban no sadinno a 89 nga armas ti nakumpiskar iti intero a rehiyon uno.
